كتير من الناس بتبدأ مشروعات، لكن مش كل مشروع نقدر نعتبره “ريادة أعمال”. فيه فرق جوهري بين إنك تبدأ بيزنس تقليدي، وإنك تكون رائد أعمال حقيقي… والفرق مش بس في شكل المشروع، لكن في طريقة التفكير والهدف من البداية.
البيزنس التقليدي هو المشروع اللي بيتبني على فكرة موجودة ومعروفة، هدفه الأساسي تحقيق دخل ثابت، بأقل مخاطرة ممكنة. زي محل، أو ورشة، أو شركة عائلية بتشتغل في نفس المجال بقالها سنين. التركيز بيكون على الاستمرارية، الربح، والحفاظ على الموجود.
أما ريادة الأعمال، فدي حاجة مختلفة تمامًا. الريادة معناها إنك شفت مشكلة وقررت تلاقي لها حل جديد، مش موجود في السوق. معناها إن عندك فكرة مختلفة، ويمكن مجنونة شوية… بس عندك إيمان إنها هتغير حاجة، وتقدم قيمة حقيقية.
الريادة مش بس منتج جديد، دي رؤية مختلفة للسوق، مخاطرة محسوبة، وطموح إنك تكبر وتوصل لأبعد من حدود المكان اللي بدأت منه.
المجتمع محتاج النوعين… لكن الشباب اللي داخلين المجال لازم يسألوا نفسهم من البداية:
“أنا باخد خطوة معتادة؟ ولا بافكر بشكل مختلف؟”
ده السؤال اللي بيحدد الطريق من أوله… واللي بيخليك تختار أدواتك، فريقك، وشكل النمو اللي بتدور عليه.
في وقت زادت فيه التحديات، بقت ريادة الأعمال مش رفاهية… بقت أمل، وطريق لاقتصاد أقوى، وشباب ليهم تأثير حقيقي.
(هشام إبراهيم حموده)
مؤسس ومدير شركة YHI متخصصة في معدات الرفع والمناولة والخدمات الصناعية.